Александр Кеплин әйелдер Ұлттар лигасы аясындағы Мажарстан W – Сербия W матчының делегаты болып тағайындалды

03 сәуір 2025, 11:06

Қазақстан футбол федерациясының операциялық директоры Александр Кеплин УЕФА әйелдер Ұлттар лигасындағы Мажарстан мен Сербия құрамалары арасындағы матчтың делегаты болып тағайындалды.

Кездесу 4 сәуір күні сағат 23:55-те (Қазақстан уақыты бойынша) Мажарстанның Дьёр қаласындағы «Дьирмот» стадионында өтеді.

Александр Кеплин – Қазақстан футбол федерациясының операциялық директоры. Ол 2018 жылдың наурыз айынан бастап УЕФА матчтарының делегаты қызметін атқарып келеді.

Аталған ойынды бельгиялық төрешілер бригадасы басқармақ. Басты төреші — Каролине Ланссенс, оған көмекшілері Мария Этьен мен Мелисса Лейеар болады.

Айта кетейік, УЕФА матчтық делегаты – бұл ұйымның ресми өкілі ретінде матчқа жауапты тұлға. Ол ойын алдындағы ұйымдастыру жиындарына төрағалық етіп, матчтың өткізілу барысын бағалайды. Сондай-ақ, делегат ойынның спорттық, инфрақұрылымдық және қауіпсіздік тұрғысынан ұйымдастырылуын үйлестіреді.