Астанада «Қайрат» – «Ақтөбе» матчына байланысты жол қозғалысына уақытша өзгеріс енгізіледі

21 ақпан 2025, 23:56

Астанада ертең, 22 ақпанда екі ірі спорттық іс-шара өтеді: футболдан Қазақстан Суперкубогы матчы және «Барыс» хоккей клубының ойыны. Осыған байланысты жолдарда кептеліс жоғары болады деп күтіліп отыр.

Сол себепті қала тұрғындарына ыңғайлы болу үшін жол қозғалысына уақытша өзгерістер енгізіледі, деп хабарлайды әкімдіктің ресми сайты.

«Қайрат» пен «Ақтөбе» футбол матчы «Астана Арена» стадионында сағат 15:00-де, «Барыс» ХК хоккей матчы «Барыс Арена» стадионында сағат 17:00-де өтеді.

Көлік ағынын біркелкі бөлу үшін ареналарға кіру және шығу бойынша жеке маршруттар ұйымдастырылатын болады:

Футбол матчының көрермендері үшін қозғалыс тек Қабанбай батыр даңғылы арқылы жүзеге асырылады.

Хоккей матчының жанкүйерлері үшін тек Тұран даңғылы арқылы кіріп, шығуға болады.

Қозғалыс шектеулері матчтар басталғанға дейін бірнеше сағат бұрын енгізіледі және олар аяқталғанға дейін сақталады. Жүргізушілер қозғалыс бағытын алдын ала жоспарлауы керек. Қолайсыздық болмас үшін қоғамдық көлікке мінген жөн.